Японы сүмо бөхийн 68 дахь их аварга Асашёорюү Дагвадоржийг заналхийлсэн талаар хэвлэл мэдээллүүдээр нийтэлсэн билээ. Энэ явдал башёгийн эхний өдөр Кисэносатог давсны дараа болсон гэнэ. Токио хотын цагдаагийн ерөнхий газар болон цагдан сэргийлэх алба интернэтэд тавигдсан мэдээллийн дагуу шуурхай арга хэмжээ авчээ.

Заналхийлсэн мэдээллийг харсан даруйдаа сүмогийн ордон руу очтол их аварга ордноос гарч явсан байсан тул яаралтай Сүмида Хонжё дүүрэг дэх “Такасаго” дэвжээний орчимд эргүүл гаргаж, хяналтдаа авсан байна. Хэдийгээр тэр өдөр их аваргад халдах ямар нэгэн зүйл болоогүй ч цагдаагийн албаныхан “Рёогокү” дахь сүмогийн ордон болон их аваргын “Такасаго” дэвжээг бүрэн хамгаалалтад авах ажлыг зохион байгуулахаар болоод байна. Японд интернэтийн сүлжээ ашиглан хэн нэгнийг дарамталж, заналхийлсэн утгатай, эзэн холбогдогчгүй мэдээлэл тавигдах, үүнтэй холбоотойгоор гарах гэмт хэргийн тоо өсч байгаа тул цагдаагийнхан Асашёорюү руу дайрсан мэдэгдлийн араас ямар нэгэн саар зүйл гарч болзошгүй хэмээн ихэд анхаарч байгаа аж.

Энэ нь их аваргыг сүрдүүлсэн хоёр дахь тохиолдол юм. Өмнө нь 2003 онд түүнийг ёкозүна болсны дараа Нагоя башёд дээрхтэй адил утга бүхий сүрдүүлэг ирж байсан бөгөөд тухайн үед Асашёорюү хүзүүний бэртлийн улмаас барилдааныг дундаас нь орхисон. Үүнийг нь “Заналхийллээс эмээсэн” хэмээн хэвлэлээр бичиж байсан удаатай.

Ямартаа ч Токиогийн цагдаагийн газрын зүгээс сүмогийн ордны эргэн тойрон, хүн их цугладаг газар, ордны дотор болон дэвжээний ойролцоох үзэгчдийн суудлын эргэн тойронд цагдаагийн хамгаалалт байрлуулахаар болсон байна. Харин энэ үйлдэлтэй холбоотойгоор их аваргын зүгээс одоогоор хэвлэлийнхэнд ямар нэгэн тайлбар хийгээгүй байгаа талаар эх сурвалж мэдээлсэн байна.

Өнөөдрийн Монгол 

Сэтгэгдэл Бичих

Нэр:
BBCode:
Сэтгэгдэл:
Түлхүүр:*