| ”Apple” компани удаан хүлээлгэсэн ”iPad” таблетаа танилцууллаа |
|
|
| Бичсэн: Administrator | ||||
| 2010-01-28, Пүрэв | ||||
.jpg "Image") MacBook, iMac, iPod, iPhone зэрэг дэлхийн хэрэглэгчдийн таашаалд нийцсэн олон шилдэг бүтээгдэхүүнээрээ алдартай "Apple" компани олон хоногийн турш яригдаж, хэрэглэгчдийг хүлээлгэсэн таблет төхөөрөмжөө албан ёсоор танилцууллаа. "Apple" компанийн ерөнхий гүйцэтгэх захирал Стив Жобс Сан-Франциско хотноо болсон арга хэмжээний үеэр "iPad" хэмээн нэрлэсэн шинэ бүтээгдэхүүнээ танилцуулсан бөгөөд смартфөүн болон лэптоп хоёрын завсрын, “гуравдагч шинэлэг бүтээгдэхүүн” гэжээ. Зах зээлийн шинжээчид "Apple"-ийн шинэ таблет төхөөрөмжийн үнийг 1000 ам.доллараас доошгүй байна хэмээн таамаглаж байсан ч Стив Жобсын мэдэгдсэнээр "iPad" таблет үзүүлэлтээсээ хамааран 499-829 ам.долларын үнэтэй байх гэнэ. Томхон хэмжээтэй iPhone мэт харагдах уг таблет төхөөрөмжийг ашиглан кино үзэж, тоглоом тоглож болохоос гадна интернэтэд холбогдох боломжтой ажээ. Түүнчлэн "iPad" нь электрон номны үүргийг гүйцэтгэх бөгөөд хэрэглэгчид "Apple"-аас саяхан нээсэн "iBook Store"-д холбогдож, электрон ном татаж авч болох гэнэ. Мэдээж хэрэг номноос гадна төрөл бүрийн сэтгүүл, сонины электрон хувилбарыг унших боломжтой. "iPad" нь 9.7 инчийн бүрэн мэдрэгчтэй дэлгэцтэй учир хэрэглэгчид төхөөрөмжийн бүхий л функцыг гараараа удирдаж болох ба хэрэв хүсвэл компьютерийн гар залгасан ч болно. Компанийн зүгээс баттерейны хүчин чадлыг нэгэн удаагийн бүрэн цэнэглэлтээр 10 цаг цэнэгээ барина хэмээн танилцуулсан байна. Хамгийн хямд үнэтэй "iPad" нь 16GB флэш меморитой, Wi-Fi холболт ашиглах боломжтой ба 499 ам.долларын үнэтэй юм. Харин хамгийн үнэтэй нь 64GB багтаамжтай, үүрэн телефоны 3G сүлжээг ашиглан интернэтэд холбогдох боломжтой бөгөөд 829 ам.долларын үнээр борлогдах ажээ.
С.Шүр news.mn
|
||||
| Шинэчлэгдсэн огноо ( 2011-02-16, Лхагва ) | ||||
| дараах > |
|---|