Харийн оронд эх орныхоо нэрийг гаргаж, сайнаар дурсуулахгүй юм аа гэхэд сануулахгүй шиг чимээгүй байх нь манайханд ховор юм. Монголчууд сайн нэртэй байх ч муу нэр нь түүнээс давамгайлж таагүй мэдээлэл нь эхэлж цацагдаж байх юм. Саяхан Оросын холбооны улсад манай улсын хоёр оюутан зам тээврийн осол гаргасан гэх мэдээлэл хэвлэл мэдээллийн хэрэгслүүдээр гарч байна.

Орос улсад суух элчин сайдын дипломат дугаартай машиныг унаж давхисан дээрх хоёр оюутан осол гаргаж зургаан машиныг "хуу хамсан" аж. Тэдний унаж явсан машин дипломат дугаартай цэнхэр өнгийн "Hyundai elentra" маркийн машин байсан гэнэ. Оюутнууд тус машиныг зөвшөөрөлгүй унаж явсан гэх боловч хэн дуртай нь дипломат дугаартай машиныг зөвшөөрөлгүй авч явах амаргүй баймаар юм.

Тэд Садовое Кольцо дахь Зубовын талбайн ойролцоо явж байжээ. Замын хөдөлгөөнд оролцож гэрлэн дохион дээр зогсож байсан "Opel", "Dodge", "Pejo", "Mitsubushi Lancer" зэрэг машинуудыг мөргөжээ. Гэсэн ч машин зогсоогүй бөгөөд мөргөлт улам хүчтэй болж байсан гэхийг сонсвол сандарсан жолооч хурдаа улам нэмсэн бололтой. Тэдний чиглэл өөрчлөгдөн замын хажууд байсан "Land cruiser" машиныг мөргөж арай гэж зогсчээ. Уг ослын улмаас дээрх машинуудын зорчигч нар хүнд хөнгөн бэртэж, хоёр цаг замын түгжрэл үүссэн байна.

Оросын холбооны улсын иргэний гар хугарч, машин нь ч авах юмгүй болсон гэсэн. Харин дипломат дугаартай машин жолоодож явсан гэх манай улсын хоёр оюутаны нэг нь машины урд салхины шилийг мөргөснөөс болж эмнэлэгт очоод нас барсан байна. Түүнийг Т гэдэг байсан бөгөөд 28 настай байсан аж. Оросын холбооны улсад цэргийн сургуульд сурдаг байсан гэнэ.

Түүний шарилыг Оросын холбооны улсаас нааш нь зөөвөрлөн авчирсан. Харин амьд үлдсэн оюутан бэртэл аван эмчлэгдэж байгаа аж. Тэд осол гаргах үедээ согтууруулах ундаа хэрэглэсэн байсан нь тогтоогдсон байна. Энэ хэргийн талаар албан ёсны мэдэгдлийг Гадаад харилцааны яам хийсэн. Гэвч тэд тодорхой мэдээлэл одоогоор өгөх боломжгүйг мэдэгдсэн.

Ямартай ч тус яаманд талийгаач залуугийн ар гэрийнхэн энэ талаарх мэдээллийг нийтэд дэлгэхгүй байхыг хүсч өргөдөл гаргасан гэнэ. Хувь хүний нууц, эрхийн асуудалтай холбоотой учраас тэд ч дуугарахыг хүссэнгүй. Осол гаргасан машины харьяалал Монголын элчин сайдтай холбоотой учраас гарсан хохирлыг төлүүлэхээр Оросын тал Гадаад харилцааны яаманд хүсэлт гаргасан байна.

Хохирлын хэмжээ хамгийн багадаа 600 мянган рубль буюу монгол мөнгөөр 24 сая төгрөг гэсэн. Оросын холбооны улсын цахим хуудаснуудад мэдээлснээр тэднийг Монгол Улсын Элчин сайдын яаманд алба хашдаг нэгэн эрх мэдэлтний хүү, эсвэл төрөл садан нь байж магадгүй гэж таамаглал дэвшүүлсэн байсан. Юутай ч гэсэн уг ослын хохирлыг Гадаад харилцааны яам нуруундаа үүрэв бололтой.

 

О.Урантогос