|
Хүний дархлааг устгагч вирусүүд эмчилгээний үед бие махбодид нуугдан алга болдог тул өвчнийг хүндрүүлж, дахин сэдрэхэд хүргэдэг. Гэтэл саяхан Мичиганы их сургуулийн вирус судлаачид ДОХ-ын вирус чухам хаана нуугдаж байдгийг тогтоожээ. Уг нээлтийн талаар “Правда” сонины сурвалжлагч Кремлийн төв эмнэлгийн ахлах эмч, анагаахын шинжлэх ухааны доктор Константин Зверевээс тодруулжээ.Эрдэмтэд өмнө нь ДОХ-ын вирусын удамшлын кодыг тайлбарлан, түүний гол чанар, байдлыг судалж байсан. Тэдний судалгааны ажлын дүнгээр халдварын вирус оршин тогтнож болох сул газрыг илрүүлж, вирусын эсрэг үр дүнтэй вакциныг бүтээсэн юм. Гэвч өндөр идэвхт уг вакцин Hb(HAART) ДОХ-ын вирусээс насан турш хамгаалах чадваргүй. Учир нь вирусын бие махбодид оршиж буй байдал илэрдэггүй тул эмчлэх арга барил түүнийг тогтоон, төгс эмчилж чаддаггүй болохоор үр дүнгүйдэлд хүрдэг байна.
“Эм, бэлдмэлээ тогтмол хэрэглэхээ больсон өвчтөнүүдэд ДОХ-ын вирус эрт, орой хэзээ нэг цагт заавал эргэн сэргэж, “үйл ажиллагаагаа” үргэлжлүүлж эхэлнэ. Нөхцөл байдлыг сайн тал руу нь өөрчилье гэвэл ямар эсүүд халдвар тээн бие махбодиор ангуучилдгийг нь таних хэрэгтэй байна” гэж судалгаа хийж буй эрдэмтэн Кэтлин Коллинс ярьжээ. Мэргэжилтнүүд вирус тээн зугтагч ямар нууцлагдмал эсүүд байдгийг тодруулах зорилго тавьжээ. Тэгэхэд Т-цусны цагаан бөөмүүд гэгч дархлааны үүсэлд хариу өгөгч цусны эсүүд вирус тээн нууцлагдмал оршдог нь илэрчээ. Харин эл нээлтээс өмнө мэргэжилтнүүд өвчний вирус нуугддаг өөр “агуулах” бий гэж үздэг байсан. Мөн зөвхөн Т-бөөмүүдэд ч бус чөмөгний үндсэн эсэд нуугддаг болохыг ч илрүүлжээ. Вирусүүд эдгээр эсийн дотор нуугдан эмчилгээ дуусах хүртэл ямар ч мэдрэмжгүйгээр амран тухалдаг аж. Үнэндээ, вирусын эсрэг эм түүнийг шинэ эсэд шурган орж үүрлэх чадваргүй болгодог ч курс эмчилгээний хугацаа дуусах үед вирус дахин сэргэдэг. Дахин сэргэхдээ “эзэн” эстэйгээ хамт өмнөхөөсөө хэд дахин их болон үрждэг аж. Цаашид эрдэмтэд өвчтөнийг эмчилгээ хийлгэн, эм бэлдмэл хэрэглэж байхад ичилтийн байдалд орон унтаж байдаг вирус бүхий үндсэн эсүүдийг хэрхэн сэрээж, хөнөөх тал дээр ажиллах юм байна. Мичиганы эрдэмтдийн явуулсан уг судалгаа өвчтөнүүдийн эмчилгээний зардлыг харьцангуй багасган хөнгөвчлөх шинэ замыг нээж байгаа бөгөөд ядуу буурай орны сая сая өвчтөнүүдэд чухал ач холбогдолтой юм.
Эрдэмтдийн судалгааны ажлын талаар К.Зверев: -Америкийн эрдэмтдийн уг нээлт өмнө нь судлагдаж, танигдаагүй олон талын ач холбогдолтой гэдэг нь илт байна. Тэгэхээр одоо ДОХ-ын халдвартай өвчтөнүүдтэй ажиллахад илүү хялбар болж байгаа юм. Өмнө нь мэргэжилтнүүд өвчтний эсэн дэх вирусыг олшруулалгүй, хаалт тавих арга хэмжээг л авдаг байсан. Харин одоо халдварын вирусын тухай илүү тодорхой мэдлэгтэй болсон тул нарийн тохирсон эмчилгээг өвчтөн тус бүрт явуулж, амьдралыг нь уртасгах боломж нээгдлээ. Түүнээс гадна ДОХ-ын халдвар авсан хүмүүсийг эрт үед нь илрүүлж, ихийг амжуулах боломжийг шинжлэх ухааны шинэ алхмууд олгосоор байгаа. Гепатит В, С вируст өвчнүүд саяхныг хүртэл эмчлэгдэшгүй хэмээн тооцогдсоор ирсэн. Гэтэл өнөөдөр ийм вирусын гаралтай өвчний эмчилгээ үр дүн сайтай нь нотлогдсон. Магадгүй ойрын ирээдүйд эрдэмтэд ДОХ-ын вирустэй эрчимтэй тэмцэж, үгүй хийж чаддаг болох буй заа. 
inet.mn
|
.jpg "Image")
