- Гэрийхнийгээ бүтэн нойртой байлгах. Биеийн болон сэтгэл санааны эрүүл байдалд нойр нэг  номерын чухал зүйл гэж эндхийн эмч нар бичдэг. Үнэхээр ч жаахан нойр, хоолноос холдоод ирэхээр толгой өвдөөд эхэлдэг болжээ. Хүүхдүүд ч гэсэн нойр дутуу хэд хонохоор сургуулиасаа ханиад амархан дагуулаад ирдгийг эцэг эхчүүд анддаггүй. Том хүмүүсийн хувьд 7-8 цаг, сургуулийн насны хүүхдүүдэд 10-12 цаг, “teen” насныхан 8-9 цаг унтах ёстой. Хүүхдүүд гэлтгүй өөрөө заримдаа чимээ шуугиангүй гээд шөнө нь юм бичиж суудаг зангаа больж ор уруугаа зүглэх цагаа хатуу баримтлах цаг болжээ.

- Тогтмол дасгал хийх. Дасгалын дүнд бие эрхтэн хөдлөхөөс гадна тархины үйл ажиллагаа “хөдлөж” идэвхждэг тул биднийг “happy” байхад маань туслах юм. Жилийн жилд л DVD, жим гээд л эхлэвч тогтмол болгож чадсангүй өдий хүрчээ. Мэргэжилтнүүдийн зөвлөж байгаагаар өдөрт 60 минут идэвхтэй хөдөлгөөн хийх хэрэгтэй гэнэ. Үнэхээр хэвшүүлэхийн тулд биелүүлж чадахгүй хэцүү зүйл төлөвлөх хэрэггүй бөгөөд хамгийн гол нь өөрийн чинь хүсэл сонирхол, зам чөлөөнд чинь тохирсон дасгалаа л олох, нөхцөл байдлын өөрчлөлтөнд уян хатнаар төлөвлөх ёстой юм байна. Мундаг хүмүүсийг дууриаж дургүй юмаа хүчээр хийвэл хэвшил болохгүй нь ойлгомжтой билээ. Дасгал гэж тусад нь цаг гаргахгүйгээр ч өдөр тутмын хийдэг зүйлдээ багтаагаад 20 минут алхах, гүйхийг оруулаад дээр нь өөрийн дуртай хөдөлгөөнөө бүжиглэх ч юмуу, дээсээр үсрэх гэх зэргээр хөдлөхөд л хангалттай болохнээ. 

- Өөртөө цаг гаргах. Ялангуяа эмэгтэйчүүд бид бусдад цагаа зарцуулсаар өөрийгөө мартдаг. Хүүхдүүдийн сургууль, дугуйлан, гэрийн даалгавар, хоол унд, бичиг цаасны засвараар ядаж 20 минутыг өөртөө зориулж ганцаараа байж ном унших, гоо сайхандаа зарцуулах, дуг хийх зэргээр өөрийгөө тордох. Хэт их зүйлээр календараа дүүргэхгүй байх. Заримдаа хэт ачаалал өгөх зүйлд хийнэ гэж бусдад амлахгүй байх, өөртөө “хэрэггүй”, “үгүй” гэж хэлж байх. Сардаа ядаж нэг удаа найзуудтайгаа уулзах, утсаар ярих цаг гаргах. Ингэснээр уур уцаар багатай “happy mom” байж түүнийг дагаад гэр бүл ч гэсэн “happy” байх боломж нь ихсэх юм. 

- Хүүхдүүддээ хариуцлага нэмэх. Урдуур нь орж гүйсээр залхуу хүүхдүүдтэй болж орхижээ. Хоол унд, цэвэрлэгээнд оролцох тодорхой төлөвлөгөөг бичиж хадах /эндхийн хүүхдүүд заавар, дүрмийг баримтлах дуртай/.

- Хүүхдүүдээ сайн хүн болоход нь бэлдэх. Харьцангуй бэлэн юман дээр өсч байгаа тэндийг өдөр тутмын саад бэрхшээлд гонгинолгүйгээр тэсвэртэй, зоригтой хандаж шийдвэрлэдэг болгох, бусдад өгөөмөр, өрөвдөж хайрлах, нинжин сэтгэлээр хандах, эцэг эх, ах дүү, эргэн тойрны хүмүүс, одоо байгаа зүйлдээ талархаж билэгшээж хандахыг дадлагажуулах явдал билээ. Энэ бүгдэд тэднийг мэдээж нэг жилийн дотор хэвшүүлж чадахгүй ч өдөр бүрийн дадлагаар тэдний насан туршид нь үлдэх билээ.

- Эрүүл хүнсний хэрэглээгээ бага багаар нэмэгдүүлэх. Өнгөрч байгаа жилд арвай гурилыг хэрэглэж хэвшсэн, улирлын шинэ жимсийг улиралд нь авч иддэг болсон “амжилтаа” нэмэгдүүлж дээр нь улирлын шинэ ногоог хоолондоо багтааж хэвшүүлэх. Аль болох цөөхөн нэмэлт орцтой, хиймэл /artificial/ болон химийн бодистой хүнсний бүтээгдэхүүн худалдаж авч байх. Оройн хоолны “хүндийг” багасгаж өглөөний хоол уруугаа “шилжүүлэх”. Хоолноос хамаарах эрүүл мэнд ямар хоол идсэнээс гадна, хоолоо яаж идсэнээс хамаарна гэдэг. Гэр бүлээрээ хоолоо удаан тайван идэж хэвших.

Мэдэхэд илүүдэхгүй

За гоё юмнаас нь эхлэе.

Гайгүй чанарын бөгөөд боломжийн үнэтэй оргилуун дарс /sparking wine/.

Шинэ он гарахын хамт сайн сайхныг ерөөн оргилуун дарсаа задалдаг билээ. Оргилуун дарс гэснээс бидний уудаг ихэнх дарс жинхэнэ шампанск биш гэдгийг бид мэдэх билээ. Мэдээж Krug, Cristal зэрэг брэндийн Францын Champagne нутагт тусгай аргаар үйлдвэрлэсэн жинхэнэ шампанскыг ууя гэвэл хэдэн зуун доллараар зарцуулах хэрэгтэй болно. Гэхдээ зарим мэргэжилтнүүд жинхэнэтэй нь дөхөж очсон чанартай бөгөөд айхтар үнэтэй биш хэд хэдэн оргилуун дарсыг дурдсан байсныг энэд оруулж байна. Үүнд:

- Калифорний “Roederer Estate Brut” /16-20 доллар/

- Калифорний State Fair-д шалгарч байсан “Gloria Ferrer Sonoma Brut” /15 доллар орчим/

- “Domaine Carneros Brut” /18 доллар орчим/

- “Gruet” /20 доллар орчим/

- Мөн Испани улсад жинхэнэ шампанск хийдэг аргаар үйлдвэрлэдэг “cava” гэж нэрлэгддэг үндэсний оргилуун дарсуудаас сонгож болно. “Freixenet Cordon Negro Extra Dry”, “Jaume Serra Cristalino Cava” / хоёулаа 8 доллар орчим/

- Итали улсын үндэсний оргилуун дарс болох  prosecco нь спиртний орц багатай, жимс, лийрний амттайгаараа онцлог байдаг гэсэн ба ойролцоогоор 20 доллараар худалдан авч болно гэжээ. Тэдний санал болгож байгаа нь “Riondo Prosecco”/16 доллар орчим/.

- Францид үйлдвэрлэсэн оргилуун дарс дотор Crement de Bourgogne-ийг зүгээр гэсэн ба эдгээрээс “Louis Bouillot Blancde Blancs”-ийг санал болгожээ. Cheers!


Калифорнид 
2012 оны 1-р сарын нэгнээс эхлэн 8-аас доош насны бүх хүүхэд жин харгалзахгүйгээр /хуучин 60 фаундаас доош бол гэдэг байсан/ бүгд car seat booster seat-тэй машинаар зорчих шинэ хууль хэрэгжиж эхэлнэ.

http://bayaraasacto.blogspot.com

	1. Бичсэн Zochin - 2012-01-11 19:41 - Зочин
	Yrgelj xeregtei zyilsiin talaar bichdegt tani bayarlaj yabdag shyy amjilt xysei!

	2. Бичсэн Ganaa - 2012-01-11 08:20 - Зочин
	Bayarlalaa, saikhan zuv bodol sanaagaa busadtai khuvaaltsaj baigaad bayarlaj baina. amjilt khusie.

Сэтгэгдэл Бичих

Нэр:
BBCode:
Сэтгэгдэл:
Түлхүүр:*