LA Mongols - Ли Мин Хо: Зүрх сэтгэл минь эзэнгүй байгаа

Тэрбээр өнөөдөр Азийн хамгийн залуухан, алдартай жүжигчдийн нэг. Ли Мин Хо нь манай үзэгчдийн сайн мэдэх Солонгосын олон ангит кино болох “Сэргэлэн охин ба F4”-ийн Гү Жүн Пюгийн дүрээрээ танил билээ. Энэхүү дүр нь түүнийг өнөөгийн энэ нэр алдарт хүргэсэн байна.

Азийн орны төдийгүй Оросын охид бүсгүйчүүдийн зүрх сэтгэлийг эзэмдэх болсон энэхүү залуу жүжигчинтэй “Аргументы и факты” сонины сэтгүүлч өөрийн биеэр уулзаж, ярилцлага авахаар шийджээ. Энэ хүсэлтийг “Star House Entertainment” агентлагт хүлээн авснаар сэтгүүлч эмэгтэй Солонгосын нийслэлийг зорьсон юм. Мария Вдоченко “Солонгос хүн гэхэд тэрбээр их нуруулаг залуу байлаа.

Хар хүрэм, тод өнгийн зангиа, өвөрмөц үсний засалт нь түүнийг ихэд ихэмсэг харагдуулж байсан ч ярилцлагын үеэр тун энгийн нэгэн байв. Мөн түүний биеэ авч яваа байдал, гадаад төрхөөс өнөөгийн Азийн залуучууд илүү европжсон мэт санагдсан юм…” хэмээн сэтгүүлч ярилцлагадаа дурджээ.

-Юуны өмнө цаг, зав гарган бидэнтэй ярилцлага өгөх болсонд талархал илэрхийлье?

-Баярлалаа. Ажлын хуваарь маань нэг сарын өмнө төлөвлөгдөн гардаг юм. Үнэнийг хэлэхэд Орос улсаас зорьж ирэн ярилцлага авна гэхэд гайхаж байлаа.

-Ярилцлагаа өөрийн тань хүүхэд насны дурсамжаас эхэлье?

-Би 1987 оны зургадугаар сарын 22-нд Сөүл хотод төрсөн. Намсунг дунд сургуулийг дүүргэж, кино урлагийн Konkuk Uniүersity- Motion Picture Art Major академийг жүжигчний мэргэжлээр төгссөн. Эцэг эх, эгчийнхээ хамт амьдардаг.

-Хүүхэд байхдаа ямар мэргэжилтэй болно гэж боддог байсан бэ?

-Би их хөдөлгөөнтэй хүүхэд байсан. Гэрийхнийгээ ч юм хийлгэдэггүй, дүрсгүй байсан. Бүр таван минут ч нэг газраа тайван зогсож чаддаггүй байсан шүү. Тэрнээсээ болж байнга шийтгүүлж, буланд зогсдог байлаа/инээв/. Гэхдээ эцэг, эх маань надад хэзээ ч гар хүрч байгаагүй. Тэд загнахаасаа илүү их ярилцдаг байсан. Ийм хөдөлгөөнтэй байсан болоод ч тэрүү бага байхаасаа л хөлбөмбөгчин болно гэж мөрөөддөг байлаа.

-Чөлөөт цагаараа спортоор хичээллэдэг гэж сонссон? Ямар спортоор хичээллэдэг вэ?

-Бүхий л спортын төрөлд дуртай. Харин хичээллэдэг спортын төрөл гэвэл усан сэлэлт, туяалзуур жад, бие хамгаалах урлаг. Ингэхэд танай улсын Ерөнхий сайд Владимир Путиныг жудогоор хичээллэдэг болохыг интернэтээс уншиж байсан юм байна.

-Ерөнхий сайд гэснээс та манай Орос орны талаар ямар бодолтой байдаг вэ?

-Дунд сургуульд байхдаа түүхийн хичээлээс ерөнхий ойлголтыг авсан. Улаан талбай, чадварлаг тамирчдаар нь сайн мэдэх юм байна шүү. Жинхэнэ цасны орон гэж сонссон. Мөн сайхан бүсгүйчүүдтэй орон гэж боддог.

-Танай улсаас дэлхийн олон сайхан мисс төрснөөр нь мэднэ.

-Ингэхэд ямар эмэгтэй таалагддаг вэ? Таны хувьд төгс эмэгтэй гэж бодож явдаг хүн хэн бэ?

-Эмэгтэй хүний гоо үзэсгэлэнгийн хүч нь ухаалаг зан гэж боддог. Мөн инээмсэглэл хамгийн сайхан чимэг болов уу. Миний хувьд төгс гэж бодож явдаг эмэгтэй бол жүжигчин Сон Хи Гёо юм./”Зочид буудлын эзэн” “Миний байшин” киноны гол дүрийн эмэгтэй/. Гэхдээ намайг түүнд дурласан гэж битгий бодоорой/инээв/.

-Кино жүжигчин болоход юу нөлөөлсөн бэ?

-Дунд сургуулийн төгсөх ангид байсан юм. Хичээлийн дараа ангийнхантайгаа хөлбөмбөгийн талбай дээр л өнждөг байлаа. Гэтэл нэг өдөр Нансёп театрын найруулагч надад нэгэн жүжгийн дүрд шалгуулахыг санал болгосон юм л даа. Би ч өөртөө итгэлгүй байсан. Гэхдээ шалгаруулалтанд очно гэж амласан болохоор заавал ч үгүй очих хэрэгтэй боллоо.

Би шалгаруулалтанд тэнцээгүй ч шалгалт авч байсан нэрт найруулагч Хан Жи Сун надтай уулзаад “Урлагийн ертөнцөд чамд асар их ирээдүй байна. Тиймээс чи эцэг эхтэйгээ зөвлөөд кино урлагийн сургуульд элсэн орохыг би зөвлөх байна” гэж хэлсэн юм. Би ч тэр тухай хэнд ч хэлэлгүй шөнөжин бодож хоноод маргааш өглөө нь гэрийнхэндээ хэлж энэ мэргэжлийг эзэмшсэн. “Сэргэлэн охин ба F4” киноны Гү Жүн Пю анхны гол дүр минь байсан.

Гараа сайн бол бариа сайн гэдэг шүү дээ. Гэхдээ бүх зүйл тийм хялбар байгаагүй. Энэ дүрийг авахаасаа өмнө би шалгаруулалтанд гурван ч удаа тэнцээгүй юм. Сүүлдээ найруулагчид өөр хүнийг тоглуулья гэхэд нь би маргааш яг чаддаг болоод ирнэ гэж гуйдаг байсан.

-Холливудын кино оддоос Леонардо Ди Каприо, Аль Пачино.

-Кинонд жүжиглэхээс гадна урлагийн өөр ямар төрөлд сонирхолтой вэ?

-Хөгжим их сонсох дуртай. Тэр дундаа хип-хоп урсгалд бүр ч илүү шүү. Өөрийн урын сандаа таван дуу зохиочихсон байгаа. Үүнээс нэг дуу нь саяханаас радио FM-үүдээр цацагдсан. Цаашид өөрийн гэсэн цомогтой болохоор төлөвлөж байгаа.

-“Сэргэлэн охин ба F4″-ийн Гү Жүн Пю та хоёрын адил болон ялгаатай зан чанар?

-Миний бүтээсэн дүр бол баян айлын эрх танхил залуу. Гэхдээ тэр эцэст нь өөрийгөө олж, нээж чадсан. Би өөрөө ч амьдрал дээрээ ийм байхыг зорьдог. Энэ нь адил тал байх. Үнэнийг хэлэхэд заримдаа энэ дүр маань бодит амьдралаас хэтэрхий хол юм шиг санагддаг шүү. Бид хоёрын хооронд бас нэг ялгаатай зүйл гэвэл Гү Жүн Пю шиг ууртай биш. Харин ч эсрэгээрээ их хөгжилтэй, нийтэч гэж өөрийгөө боддог.

-Залуу жүжигчний хувьд богино хугацаанд асар их нэр алдарт хүрсэн. Гэхдээ нэр алдрыг дагаад элдэв шуугиан, хэл аманд өртөх нь их байдаг?

-Ялангуяа олны танил болсон хүний хувийн амьдрал гарцаагүй олны анхаарлыг татаж байдаг. Энэ нь шоу бизнесийн хууль. Кино дэлгэцнээ гараад удаагүй байтал дуучин Кан Мин Гён бид хоёрыг хайр сэтгэлийн холбоотой хэмээсэн шуугиан интернэтээр цацагдсан юм. Гэхдээ агентлагийнхан маань элдэв шуугиан ямар ч жүжигчнийг дагалдаж байдаг талаар өмнө нь надад хэлж байсан болохоор би тэгтлээ их санаа зовоогүй ээ. Тэгээд ч бид хоёр эгч дүү шиг сайхан найзладаг.

-Таны зүрх сэтгэлийг эзэмдсэн бүсгүй байгаа талаар олон эмэгтэй сонирхож байгаа?

-Миний жүжигчний гараа дөнгөж эхлэж байгаа болохоор ойрын хугацаанд хувийн амьдралдаа анхаарах завгүй л явна. Тиймээс зүрх сэтгэл минь эзэнгүй байгаа гэж ойлгож болно.